Կարծում եմ, որ հոկտեմբերի 10-ին ԵԱՏՄ հիմնադիր երկրների ղեկավարների հանդիպմանը ինչ-որ քայլ կկատարվի Եվրասիական տնտեսական միությանը Հայաստանի ինտեգրման ճանապարհին: Սեպտեմբերի 22-ին մամուլի ասուլիսում այդպիսի կարծիք է հայտնել «Ղարաբաղ» կոմիտեի անդամ, ներքին գործերի նախկին նախարար, ազգային անվտանգության գծով Հայաստանի առաջին նախագահի խորհրդական Աշոտ Մանուչարյանը:
Ընդ որում վերլուծաբանը դժվարացել է ներկայացնել ստորագրման նախապատրաստվող համաձայնագրի մանրամասները: Մանուչարյանը նաև համոզված է, որ ցանկացած ինտեգրման նախագծում կան դրական և բացասական կողմեր: Ընդ որում նա կարծում է, որ ԵԱՏՄ-ին Հայաստանի ինտգրման համար ոչ մի խոչընդոտ չկա:
«Իրականում, այդ տնտեսական միությանն ինտեգրվելիս Լեռնային Ղարաբաղի հարց չի եղել. դա Ղազախստանի նախագահ Նուրսուլթան Նազարբաևի կողմից արհեստականորեն ուռճացվող խնդիր է: Դա նաև զարմանալի չէ, չէ որ Նազարբաևը անգլոսաքսոնյան արժեքների կրող է», - կարծում է վերլուծաբանը: Նա համոզված է, որ արցախյան խնդիրն այսուհետև չի շոշափվի, քանի որ Ռուսաստանը բացահայտ սպառնացել է Ղազախստանին:
Անդրադառնալով Ռուսաստանի դեմ Արևմուտքի պատժամիջոցներին` Մանուչարյանը կարծիք է հայտնել, որ այդ միջոցները Մոսկվայի օգտին կլինեն: «Պատժամիջոցների արդյունքում ռուսական օլգարխները ստիպված կլինեն իրենց փողերը դուրս բերել օֆշորներից` հրաժարվելով արևմտյան ազդեցությունից: Ոչ ոքի համար գաղտնիք չէ, որ ռուսական «էլիտայի» մեծ մասն Արևմուտքի դրածոներ են: Իսկ առկա դիմակայությունը կօգնի ձերբազատվել Արևմուտքի քայքայիչ ազդեցությունից և առողջացնել ռուս հասարակությունը», - կարծում է Մանուչարյանը: