Արմինֆո. ՀՀ ԱԳՆ-ը հանդես է գալիս Ռուսաստանի և Իսրայելի քաղաքացի, բլոգեր Ալեքսանդր Լապշինի աջակցությամբ, ով Բաքվի պահանջով ձերբակալվել էր Բելառուսի իշխանությունների կողմից, կառավարության նիստից հետո լրագրողներին հայտարարել է ՀՀ փոխարտգործնախարար Շավարշ Քոչարյանը: Փոխնախարարի խոսքով, դժվար է կանխատեսել, թե ինչպես կլուծվի հարցը, քանի որ ալիևյան ռեժիմը միջազգային իրավունքի շրջանակներից դուրս է գործում:
«Ակնհայտ է, որ դա միջազգային իրավունքի նորմերի կոպտագույն խախտում է՝
ինչպես քաղաքացիների ազատ տեղաշարժի, այնպես էլ խոսքի ազատության մասով: Տվյալ պահին կա միջազգային կառույցների և պետությունների համպատասխան արձագանքը: Տեսնենք, թե ինչպես կզարգանա իրավիճակը»,- նշել է Քոչարյանը:
ՀՀ փոխարտգործնախարարը հիշեցրել է, որ արդեն եղել է ՌԴ ԱԳՆ ղեկավար Սերգեյ Լավրովի արձագանքը, որը, նրա խոսքով, կարելի է դրական գնահատել»,- ասել է Քոչարյանը:
Նշենք, որ ՌԴ արտգործնախարար Սերգեյ Լավրովը, մեկնաբանելով Ադրբեջանի պահանջով Ալեքսանդր Լապշինի ձերբակալումը, նշել էր, որ Ռուսաստանը դեմ է լրագրողի կամ մասնավոր անձանց կողմից այս կամ այն տարածաշրջան այցելության քրեականացմանը: «Դեմ ենք նաև այն բանին, որ այս կամ այն երկրում ձերբակալված ՌԴ քաղաքացիներն արտահանձնվեն երրորդ երկիր: Մենք հյուպատոսի միջոցով կապվել ենք Լապշինի հետ: Գիտենք, որ նա միաժամանակ Իսրայելի քաղաքացի է, և իսրայելցի դիվանագետները ևս նրա հետ կապի մեջ են եղել: Ձեռնարկելու ենք բոլոր միջոցները այս իրադրությունը կարգավորելու համար՝ ամբողջությամբ հարգելով ՌԴ քաղաքացու իրավունքները»,- հայտարարել է Լավրովը:
Հունվարի 16-ին Հայաստանում Բելառուսի դեսպանատան առջև բողոքի ակցիա է տեղի ունեցել՝ ի պաշտպանություն բլոգերի: Ավելի վաղ ՀՀ Փաստաբանների պալատը ձևավորել էր մասնագիտական աշխատանքային խումբ, որը գտել է, որ Ալեքսանդր Լապշինի հանձնումը Ադրբեջանական Հանրապետության գլխավոր դատախազի պահանջով անթույլատրելի է, քանի որ այն հակասում է միջազգային և Բելառուսի ներպետական իրավական ակտերի պահանջներին։
↧