Քոչարյանը՝ Ղարաբաղի վերաբերյալ Լավրովի հայտարարության մասին. ՌԴ արտաքին քաղաքական գերատեսչության ղեկավարը բացահայտեց այն, ինչ առանց այդ էլ ակնհայտ էր

Արմինֆո. «ՌԴ արտաքին քաղաքական գերատեսչության ղեկավարը բացահայտեց այն, ինչ առանց այդ էլ ակնհայտ էր»,- այսօր կառավարության նիստից հետո  հայտարարել է փոխարտգործնախարար Շավարշ Քոչարյանը՝ մեկնաբանելով Սերգեյ Լավրովի այն հայտարարությունը, որ Լեռնային Ղարաբաղի շուրջ հակամարտությունն արդեն ինչ-որ աբստրակտ բան չէ և ոչ էլ` բացառապես Ադրբեջանի ներքին գործը»: Քոչարյանի կարծիքով, Լավրովի կողմից Ղարաբաղի վերաբերյալ նման պատասխանի է հանգեցրել ադրբեջանցի լրագրողի լկտի հարցը: Ինչպես նշել է փոխարտգործնախարարը, ԵԱՀԿ ՄԽ համանախագահները սովորաբար հանդես են գալիս  բավական զուսպ հայտարարություններով: «Տվյալ դեպքում լրագրողի անպարկեշտ հայտարարությունը հանգեցրել է այն բանին, որ Լավրովը բացահայտել է ակնհայտը»,- հայտարարել է նա: Միաժամանակ Քոչարյանը նշել է, որ մինչ օրս Մինսկի խումբը հավասարության նշան է դնում Երևանի և Բաքվի միջև, ինչն ալիևյան ռեժիմին դրդում է ավելի ագրեսիվ գործողությունների:   Հիշեցնենք, որ հունվարի 17-ին Մոսկվայում ամենամյա ամփոփիչ ասուլիսի ժամանակ Ռուսաստանի արտգործնախարար Սերգեյ Լավրովը նշել էր, որ Լեռնային Ղարաբաղի շուրջ հակամարտությունն արդեն ինչ-որ աբստրակտ բան չէ և ոչ էլ` բացառապես Ադրբեջանի ներքին գործը: Ռուսաստանի արտգործնախարարը հիշեցրել է, որ գոյություն ունի Լեռնային Ղարաբաղի հակամարտության կարգավորման մի ամբողջ գործիքակազմ, նախևառաջ, այն որոշումները, որոնք կայացվել են ՄԱԿ Անվտանգության խորհրդում հակամարտության ամենաթեժ պահին և պահանջում էին կրակի դադարեցում: «Այն ժամանակվանից ի վեր ուժի մեջ է օկուպացված տարածքներն ազատելու պահանջը, սակայն ոչ մի դեպքում` ուժով, այլ Լեռնային Ղարաբաղի վերջնական կարգավիճակի սահմանման դեպքում», - նշել էր Ռուսաստանի արտգործնախարարը:   Անդրադառնալով ՌԴ ԱԳՆ ղեկավար Սերգեյ Լավրովի հայտարարությանը, որ Լեռնային Ղարաբաղի շուրջ հակամարտությունն արդեն ինչ-որ աբստրակտ բան չէ և ոչ էլ` բացառապես Ադրբեջանի ներքին գործը՝ Ադրբեջանի ԱԳՆ ղեկավար Էլմար Մամեդյարովն ընդգծել է, որ համաշխարհային ողջ հանրությունը ճանաչում է Ադրբեջանի ինքնիշխանությունը և տարածքային ամբողջականությունը: «Ինչ վերաբերում է խաղաղարար գործընթացին, ապա բանակցային գործընթացը միջազգային հարթակ է՝ միջազգային իրավունքի նորմերի և սկզբունքների հիման վրա հարցի կարգավորման համար: Հակամարտության կարգավորման հետ կապված կան միջազգային կազմակերպությունների բազմաթիվ որոշումներ և բանաձևեր՝ հիմնված միջազգային իրավունքի նորմերի ու սկզբունքների վրա»,- նշել է դիվանագետը: