ԱՄՆ Կալիֆորնիա նահանգի օրենսդիր մարմնի կանոնադրական հանձնախումբը 9 թեր մեկ դեմ քվեով հավանություն է տվել ԼՂՀ ճանաչման վերաբերյալ բանաձևին և ԱՄՆ նախագահին ու Կոնգրեսին կոչ է արել նեցուկ կանգնել Արցախի ժողովրդի ինքնորոշման իրավունքին:
Ինչպես հաղորդում է Ամերիկայի հայ ազգային կոմիտեն (ԱՀԱԿ), AJR 32 բանաձևը ներկայացրել էր Կալիֆորնիայի օրենսդիր մարմնի անդամ Մայք Գաթոն: Մայիսի 8-ին բանաձևը կքննարկվի Կալիֆորնիա նահանգի օրենսդիր մարմնի լիագումար նիստում:
ԱՀԱԿ ներկայացուցիչ Նորա Հովսեփյանը երախտագիտություն է հայտնել Գաթոյին այդ կարևոր օրինագծի համար: Նա հույս է հայտնել, որ Կալիֆորնիան Ռոդ Այլենդի, Մենի, Մասաչուսեթսի և Լուիզիանայի հետ միասին կպաշտպանի Արցախի ժողովրդի ինքնորոշման իրավունքը և իր պատմական հայրենիքում անկախ ու ժողովրդավարական պետություն կառուցելու հնարավորությունը: