Մարտի 8-ին Երևան Մոլ առևտրի կենտրոնում տեղի ունեցավ Ամերիաբանկի «Արշակունյաց» մասնաճյուղի բացման արարողությունը

 Մարտի 8-ին Երևան Մոլ առևտրի կենտրոնում տեղի ունեցավ Ամերիաբանկի «Արշակունյաց» մասնաճյուղի բացման արարողությունը: Ինչպես ԱրմԻնֆո գործակալությանը տեղեկացվել է Ամերիաբանկի մամուլի ծառայությունից, միջոցառման ընթացքում հանրությանը ներկայացվեց մասնաճյուղում հասանելի նոր` Express Banking ծառայությունը, ինչպես նաև անցկացվեց խաղարկություն, որի հաղթողները ստացան մրցանակներ Ամերիաբանկի կողմից. 1-ին տեղը գրավողը` iPad Air պլանշետ, 2-րդ տեղը գրավողը` 100 հազար դրամ արժողությամբ նվեր-քարտ, իսկ 3-րդ տեղը գրավողը ` 50 հազար դրամ արժողությամբ նվեր-քարտ:

Աղբյուրի համաձայն, Ամերիաբանկը բացեց իր հերթական մասնաճյուղը Երևան քաղաքում (հասցե` ք. Երևան, Արշակունյաց 34/3): Իր գործունեությունը ծավալելով առևտրային մեծ կենտրոնում` մասնաճյուղը հաճախորդների համար առավելագույն հարմարավետություն ապահովելու նպատակով` աշխատելու է հատուկ գրաֆիկով` շաբաթական 7 օր, ժամը 10:00-ից մինչև ժամը 22-ը: Նորաբաց մասնաճյուղում գործում է Express banking ծառայությունը, որի համար տեղադրված են ինքնասպասարկման սարքավորումներ:

Մասնաճյուղը մատուցելու է Ամերիաբանկի կողմից առաջարկվող բոլոր ծառայություննները:

Բոլոր այն իրավաբանական և ֆիզիկական անձինք, որոնք 2014թ. մարտի 8-ից մինչև 2014թ. հունիսի 8-ն ընկած ժամանակահատվածում հաշիվ կբացեն և կսպասարկվեն Ամերիաբանկի նորաբաց «Արշակունյաց» մասնաճյուղում, կօգտվեն արտոնյալ պայմաններով մի շարք ծառայություններից, մասնավորապես. նոր ֆիզիկական անձի հաշվի անվճար բացում`անկախ արժույթի տեսակից և անվճար միացում Ինտերնետ Բանկինգ համակարգին, Նոր ֆիզիկական անձ հաճախորդներին կտրամադրվի Arca, Visa Electron կամ Maestro պլաստիկ քարտեր անվճար՝ զեղչելով առաջին տարվա սպասարկման վճարը: Եթե հաճախորդը ցանկանա ձեռք բերել Visa/Master Gold կամ Platinum քարտատեսակ՝ սահմանել 50% զեղչ առաջին տարվա սպասարկման համար,  Նոր իրավաբանական անձի հաշիվ բացելու դեպքում` կազմակերպության 3 ղեկավարներին կտրամադրվի վարկային քարտ` 1 տարվա անվճար սպասարկմամբ: Քարտի տեսակը որոշվում է վարկային սահմանաչափից ելնելով` ըստ սահմանված պայմանների, Business քարտի տրամադրում` 1 տարվա անվճար սպասարկմամբ, Բանկ-հաճախորդ կամ Ինտերնետ Բանկինգ (մինչև երկու օգտագործող) համակարգի տրամադրում` 1 տարվա անվճար սպասարկմամբ:

Ինչպես նաև «Երևան Մոլ» առևտրային կենտրոնի բոլոր աշխատակիցներին և «Երևան Մոլ»-ի խանութների բոլոր աշխատակիցներին կտրամադրվի տարեկան 18% տոկոսադրույքով վարկային գիծ` յուրաքանչյուրին զուտ աշխատավարձի քառապատիկի չափով: Աշխատավարձային քարտերը կտրամադրվեն առաջին տարվա համար առանց սպասարկման վճարի։

Նշվում է, որ Ամերիաբանկը մասնաճյուղերի տեխնիկական բարձր հագեցվածությունն ու սպասարկման որակը համարելով գլխավոր պայման մասնաճյուղերի գործունեության համար`«Արշակունյաց» մասնաճյուղում ևս ներդրել է առաջադեմ ու ժամանակակից տեխնիկական միջոցներ: Կապը Բանկի գլխամասային գրասենյակի հետ, ինչպես և մյուս մասնաճյուղերում, ապահովված է online ռեժիմով: Իսկ մասնաճյուղն իր հարմարավետ դիրքի, ժամանակակից տեխնիկական հագեցվածության, աշխատանքային երկար ժամերի և պրոֆեսիոնալ անձնակազմի միջոցով կապահովի հաճախորդների սպասարկման համար բարենպաստ պայմաններ:

Նշենք, որ Ամերիաբանկը ունիվերսալ բանկ է և ներդրումային, կորպորատիվ և մանրածախ բանկային ծառայություններ է տրամադրում` բանկային լուծումների համալիր փաթեթի տեսքով: 2011 թվականի նոյեմբերից բանկի մաժորիտար բաժնետերն է Ամերիա Խումբը, որի մասնաբաժինը կազմում է 99.99%: