ՀՀ ոստիկանության հասարակայնության հետ կապերի և լրատվության վարչության պետ Աշոտ Ահարոնյանը «Ֆեյսբուքի» իր էջում հերքել է վերջին օրերին Հայաստանում երեխաների առևանգման և խոշտանգման վերաբերյալ սոցցանցերում տարածվող տեղեկությունները։
«Վերջին օրերին որոշ անձինք սոցցանցերում լուրեր են տարածում, թե իբր հանրապետությունում երեխաներ են առևանգվում ու խոշտանգվում: Հայտարարում ենք, որ այդ լուրերը չեն համապատասխանում իրականությանը», - գրել է Ահարոնյանը: Նա, միևնույն ժամանակ, կեղծիք տարածողներին կոչ է արել ձեռնպահ մնալ նման անպատասխանատու պահվածքից ու վերջ տալ հանրության մեջ անհիմն խուճապ տարածելու փորձերին:
Նշենք, որ վերջին օրերին սոցցանցերում հայտնված գրառումների համաձայն, հանրապետության ողջ տարածքում անհայտ անձինք երեխաների են առևանգում, խեղում են նրանց ու հանում օրգանները: