ՀՀ քննչական կոմիտեի Երևանի քննչական վարչության Աջափնյակ և Դավթաշեն վարչական շրջանների քննչական բաժնում քննվող քրեական գործով ձեռնարկված քննչական գործողություններով պարզվել են Անի Մաջնունյանի սպանության հանգամանքները, շարժառիթը:
Ինչպես ԱրմԻնֆո-ին
հաղորդել են ՀՀ քննչական կոմիտեի մամուլի ծառայությունից, ձեռք բերված ապացույցների համակցությամբ` Երեւանի 20-ամյա բնակչին, 1995թ. ծնված Մուշեղ Մխիթարյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 8-րդ կետով (սպանություն` զուգորդված ավազակությամբ)։ Նույն օրը քննիչը միջնորդություն է
ներկայացրել դատարան՝ մեղադրյալի նկատմամբ որպես խափանման միջոց կալանավորումը կիրառելու վերաբերյալ, ինչը բավարարվել է:
Նախաքննությունը շարունակվում է։ Կատարվում են անհրաժեշտ քննչական և
դատավարական գործողություններ՝ սպանության բոլոր
հանգամանքների բազմակողմանի, օբյեկտիվ և
լրիվ հետազոտումն ապահովելու ուղղությամբ։
Արդյունքների մասին
տեղեկություն կտրամադրվի լրացուցիչ։
Հիշեցնենք, որ օգոստոսի 5-ին ահազանգ էր ստացվել, որ Աջափնյակ վարչական շրջանի բնակելի բազմահարկ շենքերից մեկի բնակարանում հայտնաբերվել է կնոջ դի։ Դեպքի վայր էր մեկնել քննչական-օպերատիվ խումբը՝ Աջափնյակ և Դավթաշեն վարչական շրջանների քննչական բաժնի պետ Սահակ Գրիգորյանի գլխավորությամբ։ Բնակարանի ննջարանի հատակին հայտնաբերվել էր տանտիրուհու՝ 1960թ. ծնված Անի Մաջնունյանի դիակը՝ կտրող-ծակող առարկայով պատճառված բազմաթիվ մարմնական վնասվածքներով։ Դիակի զննությամբ հայտնաբերվել էր դանակի շեղբ՝ մարմնի մեջ։ Դեպքի վայրի զննությամբ պարզվել էր, որ տան իրերն ամբողջությամբ եղել են տակնուվրա արված, հագուստները՝ թափթփված։ Դեպքի առթիվ Աջափնյակ և Դավթաշեն վարչական շրջանների քննչական բաժնում հարուցվել էր քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 8-րդ կետով՝ (սպանություն՝ զուգորդված ավազակությամբ)։ Դեպքի վայրից վերցվել էին փորձանմուշներ, նշանակվել էին փորձաքննություններ։ Քննիչի մասնակցությամբ օգոստոսի 6-ին կատարվել էր դիահերձում, որի ժամանակ դիակի վրա արձանագրվել էր 58 մարմնական վնասվածք՝ մարմնի տարբեր մասերում։
Էքստրասենս Անի Մաջնունյանը մասնակցում էր «Վեցերորդ զգայարան» հեռուստահաղորդմանը: