Հայաստանի քննչական կոմիտեն քրեական գործ է հարուցել Եղվարդի թիվ 1 մանկապարտեզում երեխաների զանգվածային թունավորման առնչությամբ: Մանկապարտեզի գործունեությունը Ժամանակավորապես կասեցվել է. քննություն է տարվում՝ պարզելու երեխաների թունավորման պատճառները:
Ինչպես
հաղորդում է ՀՀ քննչական կոմիտեի տեղեկատվության և հասարակայնության հետ կապերի բաժինը, նոյեմբերի 28-ին` ժամը 18:40-ին, Եղվարդ
քաղաքի «Նաիրիի» ԲԿ-ից ահազանգ
է ստացվել, որ «սննդային թունավորում» նախնական ախտորոշմամբ Եղվարդ քաղաքի թիվ 1 մանկապարտեզից բուժօգնության են տեղափոխվել մանկահասակ երեխաներ:
Ահազանգից անիմիջապես հետո ՀՀ քննչական կոմիտեի Կոտայքի մարզային քննչական վարչությունում նախապատրաստվել են նյութեր, որոնց հիման վրա հարուցվել է քրեական գործ՝ ՀՀ քրեական օրենսգրքի 279-րդ հոդվածի 2-րդ մասի 1-ին և 2-րդ կետերով (սպառողների կյանքի կամ առողջության անվտանգության պահանջներին չհամապատասխանող ապրանքներ իրացնելու կամ ծառայությունների մատուցումը, որը կատարվել է մանկահասակների համար նախատեսված ապրանքների, աշխատանքների կամ ծառայությունների կապակցությամբ` անզգուշությամբ վնաս պատճառելով երկու կամ ավելի անձանց առողջությանը):
Մանկապարտեզում կատարվել է զննություն, փորձանմուշներ են վերցվել մանկապարտեզում առկա պահեստավորված սննդի տեսակներից, օրվա ճաշատեսակից։ Առգրավվել են մանկապարտեզին մատակարարված սննդի փաստաթղթերը։ Վարույթն իրականացնող մարմնի որոշմամբ՝ ժամանակավորապես կասեցվել է մանկապարտեզի գործունեությունը, միջոցներ են ձեռնարկվում՝ պարզելու թունավորման աղբյուրը։ Քննության տվյալներով՝ ընդհանուր առմամբ հոսպիտալացվել է 54 երեխա, որոնցից 19-ն արդեն դուրս են գրվել։
Առողջապահության նախարարության մամուլի ծառայության հաղորդման համաձայն, նախարարության մասնագետները տեղում էպիդեմիոլոգիական հետազոտություններ են անցկացնում և ձեռնարկում կանխարգելիչ միջոցառումներ: Ըստ նախնական տվյալների, թունավորումը պայմանավորված է սննդային գործոնով: Աշխատանք է տարվում նոր հիվանդների հայտնաբերման ուղղությամբ: