Ռազմաշունչ հռետորաբանությամբ և Արցախի ու Ադրբեջանի զինված ուժերի շփման գծում խախտումների միջոցով Բաքուն ուժ է ցուցադրել`բանակցային գործընթացի վրա ազդելու նապատակով, լրագրողների հետ զրույցում հայտարարել է ՀՀ պաշտպանության նախարար Սեյրան Օհանյանը:
Նախարարը նշել է, որ ադրբեջանական կողմը շփման գծում սադրանքների միջոցով փորձում է միակողմանի զիջումներ կորզել և Հայաստանին ու Արցախին հակամարտության կարգավորման`իրեն շահավետ լուծում պարտադրել:
ՙՄենք փոխադարձ պայմանավորվածությունների կողմնակից ենք, որոնք կհանգեցնեն Արցախի ինքնորոշմանը՚,- ընդգծել է նա: Օհանյանը ևս մեկ անգամ կրկնել է, որ հայկական կողմը հանդես է գալիս խաղաղ ճանապարհով կարգավորման հասնելու անհրաժեշտության դիրքերից, սակայն անհրաժեշտության դեպքում պատրաստ է պաշտպանել Հայաստանի և Արցախի սահմանները: Ըստ որում, նախարարը նշել է, որ տվյալ պահին իրավիճակը ինչպես ԼՂՀ և Ադրբեջանի ԶՈւ շփման գծում, այնպես էլ հայ-ադրբեջանական սահմանին կայուն է: