Արմեն Մարտիրոսյանի եւ Դավիթ Սանասարյանի հարցով Երեւանի ավագանու «Բարև Երևան» խմբակցության դիմումի կապակցությամբ այսօր Մարդու իրավունքների պաշտպանի որոշմամբ սկսվել է հարցի քննարկման ընթացակարգ: Ինչպես ԱրմԻնֆո-ին հաղորդել է ՄԻՊ մամուլի խոսնակ Զոհրապ Եգանյանը, քննարկման հետագա ընթացքի մասին կտեղեկացվի լրացուցիչ:
Ավելի վաղ Երևանի ավագանու «Բարև Երևան» խմբակցությունը նամակով դիմել էր ՀՀ մարդու իրավունքների պաշտպան Արման Թաթոյանին՝ խնդրելով նրա աջակցությունը Արմեն Մարտիրոսյանի և Դավիթ Սանասարյանի նկատմամբ խափանման միջոցը փոխելու հարցում:
Խմբակցությունը հիշեցնում է, որ Արմեն Մարտիրոսյանն ու Դավիթ Սանասարյանը երկու ամսով կալանավորվել են, որով խոչընդոտվել է խմբակցության գործունեությունը: «Հաշվի առնելով խմբակցության փոքրաթիվ կազմը՝ նրանցից յուրաքանչյուրի ներկայությունն ու մասնակցությունը խմբակցության գործունեությանը շատ արժեքավոր է: Հետևելով նրանց փաստաբանների հիմնավորումներին՝ «Բարև Երևանը» համոզմունք է հայտնում, որ Արմեն Մարտիրոսյանի և Դավիթ Սանասարյանի նկատմամբ հետապնդում է իրականացվում իրենց քաղաքական հայացքների համար, որը հակասահմանադրական է: Նրանք երևանցիների կողմից ընտրված անձինք են, և նրանց կալանավորմամբ խոչընդոտվել է քաղաքացիների նկատմամբ իրենց պարտավորությունների իրականացումը, որն իրեն ժողովրդավարական հռչակած երկրի համար անհամատեղելի երևույթ է», - նշվում է խմբակցության հաղորդագրությունում: