Հայաստանի փոխատրգործնախարար Շավարշ Քոչարյանը հունիսի 9-ին լրագրողների հետ զրույցում հայտարարել է, որ Հայաստանի և Ադրբեջանի նախագահների հանդիպման օրն առայժմ հայտնի չէ, և խոստացել է հասարակայնությանն իրազեկել` հենց որ տեղեկություն հայտնվի:
Հիշեցնենք, որ մայիսի 16-ին Հայաստանի նախագահ Սերժ Սարգսյանը և Ադրբեջանի նախագահ Իլհամ Ալիևը մասնակցել են ԵԱՀԿ Մինսկի խմբի համանախագահող երկրների արտաքին գործերի նախարարների նախաձեռնությամբ և ԱՄՆ պետքարտուղար Ջոն Քերիի, ՌԴ արտգործնախարար Սերգեյ Լավրովի, Ֆրանսիայի եվրոպական հարցերով պետքարտուղար Արլեմ Դեզիրի մասնակցությամբ տեղի ունեցած քննարկմանը: Հայաստանի և Ադրբեջանի նախագահները վերահաստատել են իրենց հավատարմությունը հադադարի ռեժիմի պահպանմանը և հակամարտության խաղաղ կարգավորմանը։ Հետագա բռնությունների ռիսկը նվազեցնելու համար երկու երկրների ղեկավարները պայմանավորվել են շուտափույթ ավարտել միջադեպերի հետաքննության մեխանիզմների ներդրման աշխատանքները։ Նախագահները նաեւ պայմանավորվել են ԵԱՀԿ գործող նախագահի անձնական ներկայացուցչի գրասենյակի մանդատի ընդլայնման շուրջ, ինչպես նաև` շարունակել անհետ կորածների մասին տվյալների փոխանակումը Կարմիր Խաչի միջազգային կոմիտեի հովանու ներքո: Երկու երկրների ղեկավարները նաև պայմանավորվել են հունիսին հերթական հանդիպում անցկացնելու շուրջ` համապարփակ կարգավորման շորջ բանակցությունները վերսկսելու համար: