Նախորդ օրն ուշ երեկոյան Հայաստանի նախագահի նստավայրում տեղի է ունեցել փակ խորհրդակցություն կառավարող ՀՀԿ «մերձավորների» նեղ շրջանակի մասնակցությամբ, հաղորդում է «Ժողովուրդ» թերթը` վկայակոչելով սեփական աղբյուրները:
Թերթն ընդգծում է, որ հանդիպման ընթացքում Սարգսյանը բարձրաստիճան հանրապետականներին հաղորդել է, թե այս օրերին Հայաստանում գտնվող ՌԴ Պետդումայի նախագահ Սերգեյ Նարիշկինն իրենից «պահանջել է» ԲՀԿ առաջնորդի պաշտոնին վերադարձնել քաղաքականությունից հեռացած Գագիկ Ծառուկյանին և «ամեն ինչ բերել այն վիճակին` ինչպես մինչև փետրվարի 12-ը»:
Ըստ թերթի, Սարգսյանը որոշակի պատասխան չի տվել ռուսաստանցի բարձրաստիճան հյուրին, քանի որ մտադիր է այդ հարցը քննարկել ՀՀԿ գործադիր մարմնում, որի նիստը, թերթի տեղեկությունների համաձայն, կկայանա այսօր երեկոյան:
Նշենք, սակայն, որ ՌԴ Պետդումայի ԱՊՀ հարցերի, եվրասիական ինտեգրման եւ հայրենակիցների հետ կապերի հանձնաժողովի նախագահ Լեոնիդ Սլուցկին օրերս Երեւանում կայացած մամուլի ասուլիսի ժամանակ գոհունակություն էր հայտնել այն առնչությամբ, որ Ծառուկյանը, «ելնելով հայ ժողովրդի շահերից, կայացրեց միակ ճիշտ որոշումը»` հեռանալ մեծ քաղաքականությունից: Հիշեցնենք, որ Ծառուկյանի և Հայաստանի նախագահ Սերժ Սարգսյանի միջև առճակատումից հետո ԲՀԿ առաջնորդն ստիպված էր հեռանալ մեծ քաղաքականությունից: