2014 թվականինանիմացիոն ֆիլմերի «ՌեԱնիմանիա» 6-րդ միջազգային փառատոնը կընթանա ոչ միայն Երևանում, այլև` Գյումրիում, հաղորդել է փառատոնի գեղարվեստական ղեկավար Րաֆֆի Մովսիսյանը` հոկտեմբերի 23-ին կայացած մամուլի ասուլիսում:
Երևանում փառատոնը կընթանա հոկտեմբերի 25-31-ը: Այս տարի փառատոնի ծրագիրը ներառում է 400 լիամետրաժ, կարճամետրաժ անիմացիոն ֆիլմեր և հոլովակներ աշխարհի տարբեր երկրներից: Ավանդույթի համաձայն, «Ռեանիմանիայի» շրջանակում կընթանան ոչ միայն ֆիլմերի ցուցադրություններ, այլև` վարպետության դասեր, որոնք կվարեն, մասնավորապես, մարկետինգի գծով մասնագետ Մարկ Շապիրոն (ԱՄՆ) և ֆիլմերի նկարիչ Կարոլին Շվայցերը (Գերմանիա):
ՀՀ-ում Ֆրանսիայի դեսպանության աջակցությամբ կներկայացվի ֆրանսիական խոշորագույն ստուդիաներից մեկը` «Ֆոլիմաժը»: Այսպես, փառատոնի շրջանակում կցուցադրվեն ստուդիայի լավագույն ֆիլմերը, իսկ «ՌեԱնիմանիայի» հյուրը կլինի ստուդիայի կոմպոզիտոր Սերժ Բեսետը:
Առաջիկա փառատոնի հետաքրքիր առանձնահատկությունը կլինի անիմացիոն ֆիլմերի մի շարք նախագծերի շնորհանդեսը: Կաննի ՄԿՓ դափնեկիր Սերժ Ավետիքյանը կներկայացնի իր նոր նախագիծը` «Վերջին ռաունդը Ստամբուլում»:, իսկ Իլյա Յուդովիչն ու Վալենտին Լապինը` «Սիրտ իմ» տիկնիկային լիամետրաժ ֆիլմը` ըստ Սարոյանի «Գեղեցիկ սպիտակ ձիու ամառը» պատմվածքի: «Սիրտ իմ» ֆիլմը նվիրված է Հայոց ցեղասպանության 100-ամյա տարելիցին, և դրա պրեմիերան նախատեսվում է 2015 թվականին` արդեն 7-րդ «ՌեԱնիմանիա» փառատոնում:
«ՌեԱնիմանիա» փառատոնը կբացի ռեժիսորներ Ստեֆան Բյոռլի և Մատիս Մալզյոյի «Սրտի մեխանիկա» ֆիլմը: Ինչպես և նախորդ տարիներին, փառատոնի շրջանակում կընթանան տարածաշրջանային պրեմիերաներ: Դրանց թվում են Ալե Աբրեուի «Մանուկն ու աշխարհը» (Բրազիլիա), որն արժանացել է անիմացիոն ֆիլմերի Անսի-2014 միջազգային փառատոնի մրցանակի: Եվս մեկ տարածաշրջանային պրեմիերա կլինի Հելեն Ժիրոյի և Թոմաս Զաբոյի «Թրթուրներ: Արկածներ մրջյունների հովտում» ֆիլմը (Ֆրանսիա): Փառատոնը կփակի Անրի Ֆոլմանի «Կոնգրես» ֆիլմը, որի պրեմիերան կայացել է Կաննի 66-րդ փառատոնում: «Կոնգրեսն» արժանացել է եվրոպական կինոակադեմիայի մրցանակի` որպես լավագույն անիմացիոն ֆիլմ:
Երևանից հետո անիմացիոն ֆիլմերի «ՌեԱնիմանիա» փառատոնը կընթանա նաև Գյումրիում: